മധുരിക്കും മറയൂരിലൂടെ

മധുരിക്കും മറയൂരിലൂടെ

ചന്ദനം മണക്കുന്ന കാടുകളിലൂടെ മാധുര്യം നുണയും കരിമ്പിന്‍ തോട്ടങ്ങളിലൂടെ സഹ്യന്റെ കുളിരുള്ള ചോലകളിലൂടെ ഒരുയാത്ര  ഇതൊക്കെയാണ് സഞ്ചാരികളെ ആകര്‍ഷിക്കാന്‍ ഇന്റർ നെറ്റില്‍ നോക്കിയാല്‍ കാണുന്ന കാഴ്ചകള്‍. ചന്ദന ഗന്ധം മറയൂരില്‍ പൊങ്ങി നില്‍ക്കുന്ന പുത്തന്‍ പണക്ക്കാരന്റെ റിസോര്‍ട്ട് മുറികളില്‍ ഒതുങ്ങി നില്‍ക്കുന്നു.മഴയുടെ കുറവ് കാരണം കരിമ്പിന്‍ തോട്ടങ്ങള്‍ക്ക് ഒരു ഉണര്‍വില്ല. പക്ഷേ ഇതിന്റെ രണ്ടിന്റെയും കുറവ്  നികത്താന്‍  സഹ്യന്റെവക കാട്ടരുവികള്‍ ഉണ്ട്,കാലൊന്നു  തൊട്ടാല്‍ മരയ്ക്കുന്ന തണുപ്പുള്ള ചോലകള്‍, ഇറങ്ങി ചെല്ലണം സഹ്യന്റെ മാറിലേക്ക്.ഒരു മൂന്ന് നാല്  ദിവസം കാണാനുള്ള കാഴ്ചകള്‍ ഉണ്ട്. 2 ദിവസം മാത്രമാണ് ഞങ്ങള്‍ക്ക് പറ്റിയത്.

ശിലായുഗ കാലത്തിലെ ഉള്ള ചരിത്രം മറയൂരിനുണ്ട്, അതിന്റെ അവശേഷിപ്പുകള്‍ അവിടെ ഇവിടെയായി കാണാം. മഹാഭാരതത്തില്‍ പാണ്ഡവന്മാര്‍ മറഞ്ഞിരുന്ന സ്ഥലം അണുന്നു പറയപ്പെടുന്നു. ടിപ്പുവിന്റെ പടയോട്ട കാലത്ത്  മധുര, തിരുപ്പൂര്‍ , കരൂര്‍ ഭാഗങ്ങളില്‍  നിന്നും  പലായനം ചെയ്ത തമിഴരാണ് ആദ്യ കുടിയേറ്റക്കാര്‍ . മറഞ്ഞിരുന്നു  യാത്രക്കാരെ ആക്രമിച്ചിരുന്ന  കൂട്ടരാണ്. മുതുവാന്മാര്‍ ആണ് പ്രധാന തദ്ദേശ വാസികള്‍.തട്ടുകട  നടത്തുന്ന ഹരിപ്പാട്‌ കാരനും പലചരക്കു കട നടത്തുന്ന പൂജപ്പുരക്കാരിയും പിന്നെ കട്ടപ്പന അടിമാലിക്കാരെയും ഒക്കെ കാണാം. എന്നിരുന്നാലും സ്വദേശികള്‍ 90% തമിഴരാണ്‌ .

ഞായറാഴ്ചകളില്‍ മലമുകളില്‍ നിന്നും ഇറങ്ങി വന്നു സാധനങ്ങള്‍ വാങ്ങി മടങ്ങുന്ന,  സ്ത്രീകളെ കുടിലിനു വെളിയില്‍ വിടാത്ത ആളുകള്‍ ആണ് മുതുവാന്മാര്‍ . തേനും കാട്ടു നെല്ലിക്കയും ഒക്കെ ആയി തലയില്‍ ഒരു വെള്ള തോര്‍ത്തും  കെട്ടി വരും. കാട്ടുതേന്‍ കിട്ടും 325 രൂപയാണ് ഒരു കുപ്പിയ്ക്കു വില .പിന്നെ മറയൂരിന്റെ സ്വന്തം ശര്‍ക്കര ആണ്  ഉള്ളത്.ലോകത്തിലെ ഏറ്റവും ഗുണമുള്ള പഞ്ചസാരയുടെ അംശം കൂടുതലുള്ള ശര്‍ക്കര.

കാഴ്ചകള്‍

 പാമ്പാര്‍ നദി

കിഴക്ക്കോട്ടു  ഒഴുകുന്ന നദികളില്‍ ഒന്നാണ്‌  പാമ്പാര്‍ . ആനമുടിയില്‍  നിന്ന് തുടങ്ങി  കാവേരിയില്‍ ഒടുങ്ങുന്ന തമിഴ്  ചായ്‌വുള്ള നദി. ഉരുള്‍ പൊട്ടിയ പോലെ നിറയെ ഉരുണ്ട പാറകള്‍ നദിയെ മനോഹരമ്മാക്കി തീര്‍ക്കുന്നു. കടവുകളില്‍ ആനകള്‍  പോയ വഴികള്‍ കാണാം. ഉദുമല്പെട്ട്  പോകുന്ന  വഴിയാണ്  നദി.

 തൂവാനം

മറയൂര്‍ - ഉദുമലപെട്ടു  വഴി ഏകദേശം 11km  സഞ്ചരിച്ചാല്‍ വെള്ളച്ചാട്ടം കാണാം. കരിമുട്ടിയില്‍ ഫോറെസ്റ്റ് ചെക്ക്‌ പോസ്റ്റില്‍  ഒരാള്‍ക്ക്  100 രൂപ കൊടുത്താല്‍ ട്രെക്കിംഗ്  പോകാം. 4 km സഹ്യന്റെ മാറിലൂടെ  നടക്കാം. ചിന്നാര്‍ നദിയിലൂടെ വെള്ളച്ചാട്ട ത്തിലേക്ക്  പോകാം. പൊങ്കല്‍  ആയതിനാല്‍ ഞങ്ങള്‍ക്ക് ആ ഭാഗ്യം ഉണ്ടായില്ല, ഗാര്‍ഡുകള്‍  എല്ലാരും  അവധിയിലാണ്. അകലെ നിന്നും  തൂവാനം വെള്ളച്ചാട്ടം  കണ്ടു നെടുവീര്‍പ്പോടെ ഞങ്ങള്‍ മടങ്ങി.

ചിന്നാര്‍ വന്യ ജീവി സങ്കേതം


നക്ഷത്ര ആമകള്‍ക്ക്  പേരുകേട്ട സ്ഥലമാണ് ചിന്നാര്‍ . മറയൂരില്‍ നിന്നും ഏകദേശം 15 കിലോമീറ്റര്‍ ഉടുമല്‍പെട്ട റൂട്ടിലാണ്‌ ചിന്നാര്‍ വന്യ ജീവി സങ്കേതം. അവിടെ ചെന്നാല്‍ പസ്സോട് കൂടി വാച്ച് ടവര്‍ കാണാം. ആന,മ്ലാവ്,കലമാന്‍,കാട്ടുപന്നി, നീലഗിരി ലങ്ഗൂര്‍,കാട്ടുപോത്ത്  ഒക്കെ വിഹരിച്ചു നടക്കുന്നത് കാണാം . പോകുന്ന വഴിയില്‍ നിറയെ കാട്ടു കോഴികളെയും കാണാം.

 മന്നവന്‍ ശോല

കേരളത്തിലെ ഏറ്റവും പ്രധാന ഷോല വനമാണ്  ആനമുടി ഷോല. ഏകദേശം  10km കാട്ടിലൂടെ നടക്കണം,കാട്ടു  ചോലകളുടെയും മലമുഴക്കി വേഴാമ്പലിന്റെയും ഒക്കെ ബാക്ക്  ഗ്രൗണ്ടില്‍ കേട്ട് നടക്കാം. കയറ്റം  ആണ്,ജീപ്പുകള്‍ അപൂര്‍വമാണ്,നന്നായി  മടുക്കും. ഞങ്ങള്‍ പാതിവഴിയില്‍ നടപ്പ് മതിയാക്കി, ഇടയ്ക്ക്  ഒരു ചെറിയ വെള്ളച്ചാട്ടത്തില്‍ ഇറങ്ങി, കാടിന്റെ തണുപ്പ്  മൊത്തം ഒളിപ്പിച്ചു വെച്ചിരിക്കുകയാണെന്ന് തോന്നിപ്പോകും. 10km  നടന്നാല്‍ സഹ്യന്റെ  താഴ് വാരങ്ങൾ  കാണാം.ആ മനോഹര കാഴ്ചയും ഇരുട്ടു വീണപ്പോള്‍ വേണ്ടാന്ന് വെച്ചു.

 കാന്തല്ലൂര്‍

കേരളത്തില്‍  ആപ്പിള്‍ കൃഷി  ചെയ്യുന്ന ഏക സ്ഥലം ആണ്. ആപ്പിള്‍,ഓറഞ്ച് ,സബര്‍ജില്‍,പ്ളം, സ്ട്രോ ബെറി,ബ്ളാക്ക് ബെറി,കാരറ്റ് തുടങ്ങിയ ശീത കാല വിളകള്‍ എല്ലാം ഇവിടെ കൃഷി ചെയ്തു പോരുന്നു. വെളുത്ത പാഷന്‍ ഫ്രൂട്ട്, ആത്ത തുടങ്ങിയവയും ഉണ്ട്.

മഠത്തില്‍ അമ്മമാര്‍ നടത്തുന്ന ഒരു ചെറിയ റിസോര്‍ട്ടും അവരുടെ ഒരു ഫാമും നമുക്ക് സന്ദര്‍ശിക്കാം. പേരും ജീരകം,വെളുത്തുള്ളി  ഒക്കെ അവിടെ കൃഷി ചെയ്യുന്നുണ്ട്. ഡോര്‍മിട്ടറിയും  ഡബിള്‍ റൂമുകളും അവിടെ കുറഞ്ഞ  നിരക്കില്‍ ലഭ്യമാണ്. നാടൻ തേനും  പഴങ്ങളും പച്ചക്കറികളും കിട്ടും ,വാങ്ങിക്കൊണ്ടു ഒന്നും പോരാണ്ട പക്ഷെ കഴിക്കാണ്ട് പോന്നു  കൂടാ.വീട്ടിൽ വാങ്ങി കഴിക്കുന്ന ആപ്പിളും തോട്ടത്തിലെ സ്വാദും അനുഭവിച്ചറിയുക.

 മുനിയറ

ആദിമ  മനുഷ്യന്‍ താമസിച്ചു എന്ന് കരുതപ്പെടുന്ന  മനുഷ്യ നിര്‍മിത ഗുഹകള്‍ ആണ്  മുനിയറകള്‍ . എങ്ങനെയാണു അവര്‍ ഇതു നിര്‍മിച്ചത് എന്നുള്ളത്  എപ്പോളും കൗതുകകരമായ ഒരു വസ്തുതയാണ്.അങ്ങ് ദൂരെ കാണുന്ന മലനിരകളെ നോക്കി കൂടെ വന്ന ജോസഫ്‌ ചേട്ടന്‍ പറയുന്നുണ്ടായിരുന്നു. മുന്നാറിലെ ചെക്ക്‌ പോസ്റ്റില്‍ നിന്നും പെര്‍മിഷന്‍ എടുത്താല്‍ കാട്ടില്‍ ക്യാമ്പ്‌  ചെയ്യാവുന്നതാണ്. ഇനിയും മനുഷ്യര്‍ എത്തി ചെല്ലാത്ത സ്ഥലങ്ങള്‍ അവിടെ ഉണ്ട് എന്നാണ്  പുള്ളി പറയുന്നെ. എന്തായാലും പുള്ളിക്കാരന്‍  ആദിവാസികളോട് വാങ്ങി  തന്ന കാട്ടുതേനിന്റെ മാധുര്യം ഞങ്ങളെ  വീണ്ടും ആ  മല മടക്കുകളിലേക്ക് വിളിക്കുന്നുണ്ടായിരുന്നു. വരും വരാതിരിക്കുല്ല.

 മറയൂര്‍  ശര്‍ക്കര

97%  പഞ്ചസാരയുടെ അംശം ഉള്ള ലോകത്തിലെ ഏറ്റവും ശുദ്ധമായ ശര്ക്കരയാണ്  മറയൂര്‍ ശര്‍ക്കര. ശര്‍ക്കര ഉണ്ടാക്കുന്നത് കണ്ടു ആസ്വദിക്കാവുന്നതാണ്. ഒരു കിലോ  ശര്‍ക്കരയ്ക്ക്  50 രൂപയാണ് വില. ശബരിമലയിലും മറ്റു ക്ഷേത്രങ്ങളിലും ഉപയോഗിക്കുന്ന ശര്ക്കരയാണ് ഇതു.

ഞങ്ങളുടെ കൂടെ 2 ദിവസം കൂടിയ മറയൂര്‍ കാരനായ ഒരു ഗൈഡ് ഉണ്ട്, ജോസഫ്‌ . പുള്ളിക്കാരന് ചെക്ക്‌ പോസ്റ്റ്‌ ഇല്‍ ഒക്കെ നല്ല പിടിപാടാണ്. ഫോറെസ്റ്റ് കരോട് പറഞ്ഞു ഞങ്ങളെ തമിഴ്നാട് ബോര്‍ഡര്‍ ഒക്കെ കടത്തി ഉദുമല്പെട്ട യില്‍ ഒക്കെ കൊണ്ട്  പോയി. നിങ്ങള്‍ക്കും ഒരു പക്ഷെ ഉപകാരമായേക്കാം. ജോസഫ്‌ - 09495880633. Home stay ഒക്കെ പുള്ളിക്കാരന്‍ ശെരിയാക്കി തരും.
കേരള അതിര്‍ത്തിയില്‍ ആനക്കല്‍ പെട്ടി എന്ന സ്ഥലത്ത് ചായക്കട നടത്തുന്ന അടിമാലിക്കാരന്‍ ബൈജു ചേട്ടന്റെ ഉച്ചയൂണിന്റെ കൈപ്പുണ്യം അറിയണമെങ്കില്‍ ഈ ജോസെഫേട്ടന്‍ തന്നെ വേണം.




മിനിമം നാലഞ്ചു ദിവസം തങ്ങണം.  തിരുമുര്‍ത്തി മലകള്‍ ,അമരാവതി  ഡാം, കുണ്ടള  ഡാം, കൊടൈക്കനാല്‍ ,ഡിണ്ടിഗല്‍ ,പൊള്ളാച്ചി ഒക്കെ കറങ്ങി നടക്കാം.